دور لك عن وطن تانى
عن خطاوى --
عن جدار تسند عليه همومك
عن صديق --عن رفيق
عن طريق ما يكونش اخره القهر
دور لك عن وطن تانى ---ما يكونش فيه العسكرى ؟
دور لك عن وطن تانى
عن قلب --يقدر يحضنك
عن امل
عن قمر --ما جربش مره يتخنق
عن ولد ما عرفش طعم الانكسار
دور لك عن نهار ---
ودور لك عن وطن تانى
غريبة عنك الحروف ---بس مش غريب الخوف
ولساك ما عرفتش معنى الوقوف ----من غير ما تسند على الحيطان !!وانت من الولادة --بيطعموك كسر الحروف
ويعلموك الخوف من العسكرى
دور لك عن وطن تانى
ما يكونش فيه الاسئلة
مالهاش إجابة
ما يكونش فيه الشمس --جاية بممنوعات
دور لك عن وطن تانى ----
ما يكونش فيه العسكرى
ما يكونش فيه العسكرى
(من اوراقى القديمة -مايو 1994 )
حمدى الاسيوطى